وانگ یی، وزیر خارجه چین که به تاجیکستان سفر کرده است، در دیدار با سراج‌الدین مهرالدین، همتای تاجیکش، بر گسترش همکاری‌های امنیتی دو کشور تاکید کرد.
او روز شنبه یکم آذر در دوشنبه پایتخت تاجیکستان گفت که دو کشور باید برای جلوگیری از نفوذ و گسترش فعالیت گروه‌های تروریستی گشت‌زنی‌های مشترک انجام دهند.
وانگ یی همکاری و گشت‌زنی مشترک را «سپر امنیتی» برای توسعه تاجیکستان و چین توصیف کرد.
وزیر خارجه چین با اشاره به اینکه افغانستان با هر دو کشور مرز مشترک دارد، بر لزوم هماهنگی پکن و دوشنبه درباره مسئله افغانستان تاکید کرد و افزود که چین از تلاش‌ها برای بازسازی و توسعه افغانستان حمایت می‌کند.
وانگ یی همچنین با امام‌علی رحمان، رئیس‌جمهوری تاجیکستان، دیدار کرد. جزئیات این دیدار منتشر نشده است.
چین از کشورهایی است که روابط نزدیکی با رژیم طالبان برقرار کرده و شهروندان چینی به سرمایه‌گذاری در معادن، منابع طبیعی و سایر پروژه‌های اقتصادی افغانستان علاقه بسیار دارند.
در مقابل، تاجیکستان به‌تازگی در ایجاد رابطه با طالبان رویکردی محتاطانه درپیش گرفته است. در همین چارچوب، حاجی یوسف وفا، والی طالبان در بلخ و از چهره‌های نزدیک به ملا هبت‌الله آخندزاده، رهبر طالبان، در سفری به تاجیکستان با مقام‌های این کشور دیدار کرده است. هفته گذشته نیز وزارت خارجه طالبان اعلام کرد که هیئتی ازسوی دولت تاجیکستان به کابل سفر کرده و با امیرخان متقی، وزیر خارجه طالبان، دیدار کرده است. طبق اطلاعیه طالبان، دو طرف در این دیدار بر گسترش همکاری‌ها تاکید کرده‌اند، اما دولت تاجیکستان درمورد این موضوع ابراز نظری نکرده است.
تاجیکستان تنها کشور همسایه افغانستان است که سفارت افغانستان را هنوز به طالبان واگذار نکرده است و همچنان محمد ظاهر اغبر، سفیر منصوب‌‌شده در دوران جمهوریت، امور سفارت را در دوشنبه پیش می‌برد. طالبان بارها از دولت تاجیکستان خواسته‌اند که اختیار سفارت را به آنان بسپارد، اما این درخواست تاکنون پذیرفته نشده است.
تاجیکستان مانند دیگر همسایگان افغانستان، ازجمله چین، از حضور گروه‌های ستیزه‌جو و تروریست در افغانستان تحت حاکمیت طالبان نگران است، ضمن اینکه مرز تاجیکستان با افغانستان بهمراتب طولانی‌تر و آسیب‌پذیرتر از مرز کوتاه و کوهستانی چین با افغانستان است.
پس از بازگشت طالبان به قدرت، تاجیکستان چندین رزمایش مشترک با روسیه در مناطق مرزی برگزار کرد و شمار نیروها و استحکامات مرزی را افزایش داد. با این حال، این اقدامات نیز نگرانی‌های امنیتی دوشنبه درمورد افغانستان را کاهش نداده است.
به نظر می‌رسد در جریان سفر وانگ یی به دوشنبه، مقام‌های تاجیکستان نگرانی‌های امنیتی‌شان درباره افغانستان را با وزیر خارجه چین در میان بگذارند، چراکه چین یکی از نزدیک‌ترین کشورهای منطقه به رژیم طالبان است.
براساس چندین گزارش سازمان ملل متحد، بیش از بیست گروه ستیزه‌جو و تروریست، که تهدیدی برای منطقه و جهان محسوب می‌شوند، در افغانستان فعالیت دارند. این گروه‌ها برای همسایگان افغانستان خطر محسوب می‌شوند، اما طالبان تاکنون تنها علیه شاخه خراسان گروه دولت اسلامی (داعش) اقدام کرده‌اند.
